الرئيسة » المدونة » الإنترنت والحجر الصحي للأرض!

الإنترنت والحجر الصحي للأرض!

في هالأيام، وكوكب الأرض كله مداير نظام #قعمز_فالحوش والإنترنت متوفية في أوروبا وأمريكا وغيرها (وهي مصادر الإنترنت في الكوكب)، أكيد صادفاتك مشاكل بطء في الإنترنت وأول حاجة حتخطر في بالك إنك تخش إدير إختبار سرعة بموقع fast.com أو غيره، ولما تبدا مشترك في باقة 8 م.ب وتجيك النتيجة زي اللي طالعتلي في الصورة هادي حتبدا تسب في شركة الإنترنت المشترك فيها!

لكن أغلب الأحيان المشكلة تكون من عندك أو من شبكات الإتصالات في أوروبا وامريكا او من الموقع اللي أنت فاتحه بس!

طبعاً لا يخفى عليك أن بسبب الحجر الصحي في العالم حالياً كنوع من مقاومة نشر عدوى مرض كورونا المستجد (كوفيد 19) فهلبا شركات حاولت تكافح الإستهلاك الثقيل للإنترنت المفاجيء هذا اللي صار واللي آثر على هلبا خدمات، مثلاً قوقل خلت اليوتيوب أول ما يفتح يعطيك دقة ضعيفة ولو تبي الدقة الأعلى لازم أنت تغيرها يدوياً، وشركة نتفلكس نقصت من نقاوة فيديواتها وغيره من القرارات اللي كلها بسبب الإستهلاك الضخم للإنترنت من الناس اللي قاعدة في الحوش وتخدم من الحوش.

الخطة

  • أول حاجة اسأل نفسك كم جهاز عندك متصل بالشبكة فالحوش؟ مرات في تلفون قاعد ايدير في تحديث للتطبيقات، او اللابتوب متعك ينزل في تحديثات في الخلفية بدون علمك، أفضل شي أنك تلغي أي مشكلة عندك في الحوش، لهذا سكر وأفصل كل الأجهزة، وجرب ثاني.
  • ثاني حاجة، لو بتجرب سرعة الإنترنت من جهازك عن طريق الوايرلس أو الراوتر فراهي مش مقياس دقيق، لأن مرات في حد خاش عالراوتر ومخترقك مثلاً (جارك العزيز، او خوك خانب الباسسورد!) أو في تطبيق معين في الكمبيوتر ينزل في تحديث وأنت مش فايق بيه.

في حالة الإنترنت عندك عبارة عن أنتينا تاخد وايرلس من برج إتصالات شركة الإنترنت عندك وتعطي للراوتر عندك في الحوش، فلازم تفصل الراوتر مرة وحدة وتربط الأنتينا طول مع اللابتوب وتغير الأي بي متع اللابتوب من اوتوماتك لستاتك زي مجال الاي بي في الأنتينا متعك واللي يختلف من نوع لثاني (لكن عادة 192.168.1.20 أو 192.168.0.20 يمشي حاله)، ودير بعدها إتصال broadband connection أو PPPoE وتحط بيانات عقدك وتتصل مباشرة وبعدين تشوف الTask Manager وتقرا قراءات الشبكة عندك قداش توصل، وهذا أفضل إختبار ممكن إديره لو تبي تعرف سرعة اتصالك مع شركة الإتصالات اللي أنت مشترك فيها.

طريقة إجراء الإتصال على ويندوز 10 من هنايا: https://www.tp-link.com/au/support/faq/921/

الإختبار

لكن طبعاً لقطة الإتصال هيا وربط الأنتينا مش كل حد يقدر عليها وأصلا مش متوفرة مع كل الشركة، يعني مرات إنت عندك جهاز 4G أو ADSL وفي هادي الحالات الطريقة ثانية تنقسم لمرحلتين:

  1. المرحلة الأولى بعد ما لغينا أن تكون في مشكلة عندنا داخل الحوش، حني مازال قاعدين نبو نعرفو هل الشركة هي اللي مسكرة عليك السرعة اللي إنت دافع فيها إشتراك أو المشكلة من الشركة اللي عاطية الإنترنت لشركتك؟

ببساطة أفتح موقع speedtest.net وخليه الموقع يجرب سرعتك داخلياً، يعني ما تغيرش السيرفر اللي حيصير عليه الإختبار واللي في الأغلب حيكون LTT او Aljeel أو ICONA أو غيرهم، خليه يحط أول سيرفر بروحه ودير الإختبار، مثلاً أني مشترك في إنترنت الكفاءة، درت إختبار سرعة عادي طلعت السرعة عندي 10 م.ب (مع العلم أني مشترك في باقة 8 م.ب اللامحدودة).

إختبار سرعة داخلي مع سيرفر في طرابلس (السرعة 10.53 م.ب)

المصدر: https://www.speedtest.net/result/9250088804

شن معناها؟ معناها أني مع الكفاءة اموري تمام، الشركة عاطيتني السرعة اللي أني دافع حقها وزيادة فوق منها حبتين مسك!

  1. المرحلة الثانية تعاود الإختبار لكن غير السيرفر في أمريكا (نيويورك مثلاً) وإختبار ثاني في بريطانيا (لندن مثلاُ) وشوف سرعة الإنترنت قداش، لأن أمورك توا مع شركة الإتصالات متعك تمام، نشوفو وضع شركة الإتصالات الدولية أو حتى اللي واخدين منهم الدولية (إيطالياً أو غيرها) واللي عاطيين لشركتك اللي أنت مشترك معاهم.
إختبار مع سيرفر في أمريكا (السرعة 1.04 م.ب)

المصدر: https://www.speedtest.net/result/9249676443

إختبار مع سيرفر في بريطانيا (السرعة 1.32 م.ب)

المصدر: https://www.speedtest.net/result/9249664213

النتيجة

تو هكي مشكلتك وضحت، الإنترنت من شركتك واصلة مية مية، لكن من برا مش واصلة تمام.

هكي عندك واحد من الإثنين، إما تتصل بشركة الإتصالات متعك وتفهم منهم هل في عطل من الشركة اللي واخدين منها الإنترنت وتشوف ردهم ونصيحتهم، أو ترضى بالأمر الواقع لأن العالم كله حالياً قاعد يعاني، لأن لما درت الإختبار الأول مع سيرفر داخل ليبيا وطلعت السرعة ممتازة، يعني لا عندك تشويش ولا مشاكل في الخط ولا الشركة مسكرة عليك ولا في حد خاش يخنب منك وكل شي تمام.

ختاماً

الحقيقة موقع Fast.com هلبا ناس تجرب فيه، وتعتمد عليه في إختبارات السرعة وأني واحد منهم، والمشكلة مش هني، المشكلة لما تطلع النت فيه بطيئة تمشي تحط اللوم على شركة الإتصالات عندك، وماخطرش في بالك أن موقع fast.com بالأساس مملوك لشركة Netflix اللي هي بروحها تعاني من بطء في الإنترنت وأمريكا كلها قاعدة تعاني، وفي الأخير ماهي إلى سيرفر يعطيك في خدمة وأكيد عندها مشاكل زيها زي أي خدمة ثانية.

في إضافة خاصة لمتصفح قوقل كروم لإختبار Speedtest عن طريقه تقدر تجرب إتصالك بالموقع اللي أنت فاتح عليه حالياً، ممكن تفيدكم أكثر، وهي إضافة رسمية وهادي صفحتها: https://www.speedtest.net/apps/chrome

لهذا الخطوات هي زي ما ذكرتها، إلغي المشاكل داخل الحوش، اربط مع الأنتينا طول كان قدرت، جرب محلياً مع شركتك قبل، وبعدين جرب برا مع سيرفر خارج ليبيا، وبناء علي النتائج تقدر تعرف مشكلتك من وين بالزبط.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *