تخطى إلى المحتوى
الرئيسة » المدونة » 20 سبب خلاني نفضل تطبيق تلغرام

20 سبب خلاني نفضل تطبيق تلغرام

كتبتلكم 20 سبب خلاني نفضل تطبيق تلغرام على واتساب وغيره، وبالفلاقي!

مرونة

  • واتساب يعطيك إمكانية إرسال ملفات معينة وبحجم مايفوتش 100 ميقا، لكن تلغرام تقدر تبعت بيه أي شي وبحجم حتى قيقا ونص.
  • عنده تطبيق منفصل على الكمبيوتر، يعني مش محتاج يكون التلفون جنبك أو تصير مزامنة معاه ومش لازم يكون متصل بالإنترنت.
  • بعد تحليل استهلاك البيانات (باستخدام GlassWire) لبعض التطبيقات الثانية زي واتساب ومسنجر فيسبوك وفايبر وقارنتها بتلغرام، لقيت إن استهلاكه اقل بهلبا سواء مكالمات صوتية أو فيديو أو رسائل صوتية، بشكل عام استهلاكه اقل.

امن

  • بكلك وحدة بس تقدر تمسح شات بينك وبين اي شخص.
  • المطورين في تلغرام اعتمدوا على تصميم بروتوكول حمايته الأمنية عالية جداً وهو “MTProto” زيد قوقل عليه، وهو بإختصار يجمع بين التشفير العالي والسرعة، وأكثر من مرة دار تلغرام تحدي لكسره واختراقه مقابل مكافأة مالية وصلت فوق من ربع مليون دولار أميركي بدون جدوى.
  • المسج اللي تبعتها تقدر تمسحها في أي وقت، ولما تمسحها ما يطلعش للطرف الثاني أنك مسحتها، ببساطة تختفي من عندكم الزوز، لا وتقدر تعدلها بعد ما تبعتها في أي وقت!
  • مفتوح المصدر، يعني مافيش كود خبيث مخفي داخل التطبيق يتجسس عليك أو يجمع معلوماتك، لأن الكود البرمجي للتطبيق مفتوح قدام العالم كله يشوفه.
  • مش مملوك لشركة فيسبوك ولا يتبع لمارك زوكربيرق، الشخص اللي تم استجوابه بسبب أكثر من خرق أمني ونشر لمعلومات المشتركين.

ترفيه

  • فيه عدد ضخم من الملصقات (Stickers) وكلها جودتها ممتازة جداً ومجانية!
  • فيه بوتات (Bots) تقدر تساعدك في هلبا حاجات زي بوت متع كسر الآيفون، وبوت موقع IMDB وغيرها، مجرد إدير كلمة في مربع البحث وتلقى تحت الإسم كلمة bot ورص عليه وتبع الخطوات.

سهولة

  • تلغرام تقدر توصل فيه من أجهزة ثانية، لينوكس، ماك، ويندوز، اندرويد، IOS وحتى من متصفح الإنترنت المفضل عندك، بينما واتساب لازم من مزامنة تلفونك في كل مرة ولازم يكون متصل بالإنترنت.
  • تقدر تفتح عالتطبيق أكثر من حساب وتتنقل بيناتها بكل راحة، مش مربوط بتلفون واحد وحساب واحد وجهاز واحد، تقدر تركبه في تلفونين وبنفس الحساب مش كل حساب برقم.
  • لما تبي تشوف الشات اللي بينك وبين اي شخص تقدر تشوف الحاجات اللي تشاركت بيناتكم بتصنيفات صور وفيديو، ملفات، روابط، رسائل صوتية، صور GIF وحتى شن هي القروبات اللي مشتركين فيها أنتو الزوز.

خصوصية

  • تقدر إدير اسم مستخدم وتبعته للغير باش يضيفوك ومافيش داعي إنهم يعرفو رقم تلفونك باش تقدر تتواصل معاهم.
  • التلغرام مافيشي إعلانات، والمطورين اعلنو من الأول أنه حيكون مجاني دائماً، والشي اللي كلنا متوقعينه ايصير للواتساب بعد ما شراته فيسبوك أن يتعبى إعلانات، وحتى لو قعد الواتساب بدون إعلانات، ماننسوش خبر أن في طرف ثالث استحوذ على بعض المحادثات في واتساب بغرض تحسين خدمات ذوي الإحتياجات الخاصة، على الرغم من أن أول ما تفتح شات مع شخص يقولك أن هادي المحادثة مشفرة وماحد يقدر يقراها!
  • محادثات سرية يتم فيها تشفير الرسائل بين الطرفين، وتقدر تخليها الرسالة تمتسح بعد وقت معين من سماعها من الطرف الثاني.

تواصل وتحكم:

  • تقدر إدير فيه قنوات عامة (أو خاصة) ترسل فيها منشورات لعدد غير محدود من الناس.
  • تقدر تحط علي المجموعات والقنوات مدراء وتحدد صلاحياتهم بشكل دقيق، يعني تحدد هل يقدر يمسح، يحظر، يعدل، يدير دعوة للغير للقناة، وتقدر تفتحلها مجموعة دردشة خاصة.
  • تقدر تفتح مجموعات دردشة توصل 200 شخص بين افراد العائلة أو الأصدقاء، ولو ما سدكش تقدر تحول لل super group واللي توصل حتى خمسة آلاف عضو اما واتساب فأكبر مجموعة فيه 256 شخص بس.
  • تقدر اضيف مكتبة صور، وتقدر اضيف تصويتات وتقدر اضيف إختبار على هيئة تصويت ولما يتم اختيار الإجابة الخطأ تحط شرح علاش خطأ.

اشترك في قناتي على تلغرام: https://t.me/alitweelblog
نزل تطبيق تلغرام من هنا: https://telegram.org
قناة نصائح تلغرام الرسمية: https://t.me/TelegramTipsAR
تم النشر على فيسوك من هنا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *