الرئيسة » مدونة طرابلسي » المولدات وكيف تعرف شن تحتاج؟

المولدات وكيف تعرف شن تحتاج؟

هلبا تسأل مولد كذا شن يشغل لهذا قررت نكتبلكم خلاصة خبرتي باش كلكم تولو زابيطة في الموضوع!

ملاحظات مهمة

  1. الموضوع طويل فبالله عليك ماتقراش سطر بسطر وتكتبلي سؤال نبدا مجاوبه وانت مش قاريه.
  2. اصدقائي مهندسي الكهرباء مش حيترددو في التعليق فياريت تحطو في راسكم ان المنشور موجه للمواطن البسيط وخلي نبتعدو عالتعقيد وخلي تعليقك موجه لغير الخبراء وعملي من واقع الحياة مش معادلات الجامعة.
  3. المقالة موجهة للي عندهم مولدات جو 7 كي في اي او اقل وعلى قد حالهم، الناس اللي عندها مولدات 30 كي في اي واركب مش موجه الكلام التالي ليهم.
  4. المولد ماتحسباش بالكي في اي (KVA)، احسبه بقداش يعطيك امبير وشوف اكبر رقم واقسمه على 2 يطلعلك الرقم اللي فيه الاداء المثالي للمولد.

كيف تحسبها؟

مثلا مولد قوته 4.5 كي في اي، بالتأكيد بيعطيك 230 فولت، لهذا خود 4.5 اضربها في 1000 وقسم الناتج على 230 يعطيك قداش امبير وهو 19A في مثالنا هذا، اقسمها على2 يعطيك 9.5A امبير وهو الاداء المثالي لو قعد استهلاكك فيه فالمولد مش حيعلى حسّه ويخدم بقوة ولو فتتها فتلقى روحك خشيت في حمل عالمولد ويعلى صوته وفي الحالتين بتخدم امورك تمام بس استهلاك النافطا حيكون اعلى لو بدي المولد يعلى صوته.

تو امشي لود على اجهزتك وشوف الRated Current واقرا اكبر رقم وهو الامبير اللي ينسحب اول مايفتح والمكيفات ماتجيش تقول مكيف 12 معناها خلاص يسحب كذا، هذا جهل كبير لأن كل مكيف وتصنيعه وصرفه، في مكيفات هومر قوة 12 يسحبو 4.5A وفي مكيفات وستنق هاوس قوة 9 يسحبو نفس الرقم 4.5A امبير.

لهذا ماتسمعش للناس وامشي اقرا شن مكتوب على الطرف الداخلي من مكيفك تلقى رقمين واحد للسخون وواحد للبارد وعادة نفس الرقم ويبدا بعده حرف A يعني مثلا 4.5A او 11.5A وهكذا.

بشكل عام مكيف 12 يسحب 4.5A ومكيف 20 يسحب 8.5A ومكيف 24 يسحب 11.5A ومع هذا في استثناءات وشركات تصنيع وماركات فامشي اقرا وشوف، بس الارقام هادي تعطيك فكرة يعني ماتجيش تقولي مكيف 24 يسحب 4A هكي مش منطقي بكل.

الثلاجة بشكل عام تسحب من 1.5A الى 3A لو فريز حجم كبير.

المحافظة:

لما بتفتح مكيف ضروري يكون على اقل درجة حرارة باش الطرف الخارجي يولع مرة وحدة بس ومعاش ينطفى لين ان تسكر المكيف، لو خليته على حرارة 25 مثلا حيقعد يولع ويطفى وهذا مش كويس للمولد وحتلاحظ المولد صوته ينفض كل شوية هذا يعني في حاجة تولع وتطفى فدير دورة وشوف شن صاير.

ننصح انك تولع المولد بدون مايكون عليه حمل وبعدين افتح عليه الحاجات واحد واحد، لأن كل جهاز اول مايخدم يسحب سحبة قوية تأثر عالمولد، يعني افتح مكيف واستنى متع تلات دقايق لين الطرف الخارجي يولع بعدين وصل الثلاجة ونفس الشي قويها عالاخير باش تولع وتقعد طول والعة مش تخدم تصقع وتطفي.

نصائح

  • مش كان مولد موديله 7000 معناها قوته 7 كي في اي! عادي موديله مرات عشرطاش وهو قوته 3 كي في اي!
  • استعمل كابل 6 في ال2 لو تبي توصل هلبا حاجات عالمولد وريح راسك من مشاكل الخيط يسخن.
  • الكوشة انساها راهي تفتح وتسكر هلبا واضر المولد من ناحية السحب.
  • السخانات يسحبو هلبا فوتهم.
  • السشوار كذلك يسحب هلبا فوته.
  • غسالة الماعين في العادة تسحب من 10A الى 16A فوتها بالطويل بالاضافة الى انك ماتقدرش تتحكم في امتا تخدم وتطفى وحتضرلك المولد.
  • الانارة في العادة عادي ماتأثرش لكن لو غيرت للامبات الاقتصادية اكيد حتوفر امبير لحاجات ثانية.
  • التلفزيون 46 انش والريسيفر على بعض مايجوش 1.5A
  • لو عندك عويلة وصغار ماتربطش الحوش عالمكيف ماتندريش من ممكن يغلط يفتح سشوار ولا مكيف ثاني ولا سخان مية ويحط حمل عالمولد.
  • المولد زي مطور السيارة يبي تشوفله فلاتره والزيت وتغيرهم حسب مامكتوب في دليل الاستخدام.
  • لما بتشري مولد احسب حوشك شن يبي وخود مولد يعطي دبل الامبير اللي اجهزتك تستهلكه، مثلا مكيف 4.5A ثلاجتين 3A وتلفزيون واضاءة نقولو 3A بالوسع مجموعهم 10.5A يعني في الواقع انت تبي مولد قوته تعطي في جو ال11.5 امبير يعني الكي في اي تحسبها بان تاخد ال11.5A ضرب الفولت 230 تقسيم 1000 بتساوي 2.6 كي في اي، ولكن باش تخدم مرتاح تبي مولد يعطيك 21A ولما نطبقو المعادلة تطلع تبي مولد 4.6 كي في اي.

معادلات

معادلة تحسب مولدك قداش يعطي امبير بناء على قداش مكتوب عليه كي في اي:

Ampere = (KVA x 1000 x PF) / 230 volt

((PF = معامل القوة واللي متعارف عليه في السوق أن قيمته 0.8 مع العلم المولد عندي قيمة معامل القوة فيه 1 مش 0.8))

معادلة تحسب قداش تحتاج كي في اي بناء على استهلاك الامبير في حوشك:

KVA = (Ampere x 230 volt) / 1000

الخلاصة

  1. احسب المولد قداش يعطي امبير وحاول ماتفوتش استهلاك نص قوة الامبير اللي يعطيها، لكن لو تبي تنزل عالمولد شوف امورك.
  2. احسب مكيفاتك قداش يسحبو امبير بروحك وحطهم عال16 وثلاجتك قويها عالاخير.
  3. حاول ماتربطش المولد مع الحوش طول.
  4. الزيت والفلاتر ماتنساهمش وماتحملش المولد طاقته كلها باش ايعيشلك.
  5. لو مولدك متع 30 كي في اي او اكثر فماعليك الا ان تشوفله فلاتره وزيته وميته وماتحملش عليه فوق من طاقته وبس.
  6. مولدات ال3 فازي (3 Phase) معادلاتهم بروحها وتصنيفهم صناعي مش منزلي لهذا المقالة لا تشملهم.

راني مش مهندس مولدات لكن مجرب وقاري هلبا تخصصي برمجة وتحليل نظم

بالله رجاء خاص اللي بينشر ايدير مشاركة ماينسخش المنشور لأني حنعدل عليه ونزيده معلومات فلو درت نسخ ولصق مش حتشوف الجديد