بغض النظر عن السؤال (هل هي أزمة مفتعلة أم حقيقية؟) قعدت هلبا نسأل في روحي هل في علاقة حقيقية بين درجات الحرارة والرطوبة وطول الانقطاعات الكهربائية في العاصمة طرابلس؟ أم هي مجرد عشوائية في طرح الأحمال؟
في سنة 2015 قررت نفتح ملف Excel في التلفون ونسجل الانقطاعات الكهربائية مع درجات الحرارة والرطوبة لحظة الانقطاع وطلعت بتقرير واضح بعيد على التخيلات والإشاعات، بل معتمد على بيانات حقيقية امتدت على مدى 8 شهور.
نتيجة البحث
بعد ما راجعت درجات الحرارة وقيم الرطوبة إكتشفت أن الحرارة مش مقياس دقيق لساعات طرح الأحمال، وماليهاش علاقة ثابتة بطول او قصر ساعات طرح الأحمال، والحقيقة أن معدل الإستهلاك شكله يتغير من يوم لثاني ومش مرتبط بدرجات الحرارة الفعلية. كيف؟
الحرارة
مثلاً، تلقى ايامات الحرارة فيها 31 ويقطعو علينا 8 ساعات، وفي ايامات تانية الحرارة 39 بس يقطعو علينا مرتين مجموعهم 8 ساعات، والفرق بين ال31 وال39 مش بسيط!
وفي ايامات ثانية الحرارة 38 يقطعوها مجرد ساعة بس ويوم ثاني الحرارة 39 يقطعوها 3 ساعات ومرات الحرارة 37 وماتنقطعش بكل!
في أيامات كانت الحرارة 35 لكن قطعو الكهرباء لمدة 10 ساعات متوالية!
الرطوبة
بالنسبة للرطوبة اللي كانت في فترة من الفترات يتكلموا بيها على اساس هي سبب رئيس لطول ساعات طرح الأحمال، مالقيتش أي دليل علمي يثبت أن ليها علاقة بطول ساعات الطرح!
في ايامات الرطوبة توصل 87% يقطعو الكهرباء ساعتين بس، وفي ايامات تنزل الرطوبة لل32% لكن يقطعو الكهرباء لمدة 10 ساعات متواصلات.
الخلاصة
بكل ثقة نقوللكم أن درجات الحرارة مش معيار لطول أو قصر درجات الحرارة، بل هو معدل الإستهلاك الحقيقي واللي هو شيء ما نقدروش حني كمواطنين نقيسوه وحيقعد إلى الأبد معروف لشركة الكهرباء فقط.
لهذا معاش بديت نعدل على درجات الحرارة زي قبل ومثلاً نقول اليوم صقع معناها الناس بتشغل الدفايات وبيقصوه علينا 8 ساعات!
ولا مثلاً اليوم الحرارة 40 معناها حيه علينا بيقصوه 12 ساعة!
الموضوع ببساطة عشوائي والشيء المشترك بين الأيامات وموسم الصيف والشتي هو أن الكهرباء حيقصوها عليك، تبي ولا ماتبيش، وإنت وحظك وعلى حسب اللي شاد التوكة هداك اليوم.
مادام مافيش شفافية مع الشركة وكل منشوراتها على الفيسبوك تقول العجز المتوقع مما يعني أن القصة كلها توقعات ومش مبنية على أرقام مؤكدة تخليك تعرف بالزبط قداش زمن الإنقطاع، فنظرية العشوائية حتقعد قائمة وكمواطن ماعندكش حل إلا ترشيد استهلاك الكهرباء وتحاول تنقص من الإستهلاك إلى أقل قدر ممكن,
نصائح
أني عارف ردة الفعل الأولى لأي نصيحة تجينا من شركة الكهرباء وهي أن مهما درنا من ترشيد للكهرباء هما حيستمرو في قصان الكهرباء علينا، لكن بالفعل ماعندنا إلا تقليل الإستهلاك {لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْراً} (الطلاق: 1).
- الدفايات خود دفايات الزيت وحطها عالمتوسط وفي دار النوم ليك وللصغار.
- المكيفات حطها على 25 أو 24 باش ماتقعدش وحدة التبريد الخارجية تخدم بإستمرار.
- حاول تسكر الشقوق في الرواشن والبيبان وتعزل الحوش كويس من التيارات اللي تسرب الحرارة للخارج، باش تزيد من كفاءة المكيف.
- السخانة حطها عالمتوسط بحيث ماتضطرش تخلطها مع المية المصقعة وفي الصيف على أقل درجة (أو سكرها).
- بدل لامبات الحوش كلها إلى النوع الإقتصادي (النيون) وحاول تسكر الضو في أي دار مافيها حد.
- تقديراً لجهود الموظفين والكادحين في شركة الكهرباء ياريت الكل يمشي يخلص فاتورته، اما المسؤولين واصحاب القرار في الشركة فلا عزاء لنا في ضميرهم الميت.
- الإتجاه والإستثمار في الطاقات البديلة شي حتمي، فدول اوروبية بالإضافة للولايات المتحدة مع سنة 2035 حتحظر استيراد السيارات العاملة بالمحروقات، ووقتها دور من يشري منك النفط!