تخطى إلى المحتوى
الرئيسة » المدونة » أليس منكم رجل رشيد؟

أليس منكم رجل رشيد؟

كل ماواحد يهفت ويقول إن شاء الله ايصير خير في هالبلاد وتتطور، ايصيرلك موقف يخليك تسأل بأعلى صوت: أليس منكم رجل رشيد؟
تسمع تقربيع عالصبح، تطلع تلقى البلدية جايين يصلحو في طوبو المية قدام القاراج، تنزل جري تلحق بتطلع السيارة، تلقاهم كبروها الحفرة وسيارتك معاش تطلع!
IMG_20150922_103210
-السلام عليكم ربي يعاون، يا شباب نبي نطلع السيارة كان فيها كيف!!
– تطلع تطلع ان شاء الله
– كيف راهي ماتطلعش هكي؟
– لا لا تطلع ان شاء الله، حني مانعطلوش
تسكت وتقعد حاير كيف حتطلع السيارة وتقول بالك في لقطة بيديروها وإنت مش فاهمها، وتحت صوت تقربيع الكاشيك وهو ينقب بدون توقف وبينك وبينه متر تقريباً، يبدا يقيم في الكسّار ويحط فيه قدام القاراج ويزيد يسكر في أي أمل لخروج سيارتك.
– يا خونا تي كيف بتطلع السيارة هكي إنت قاعد اتضيق عليا مش توسع!
– (واحد تاني) تو بكري قالك السيارة تطلع انت سكتت وماطلعتهاش!
– تي ماتطلعش بكري ولما تكلمت قلتولي تطلع وأني قلتلكم ما تطلعش وزميلك قالي لا مانعطلوش وإنتم مازال واضح معطلين!
– تو خلاص يا خونا
– ………..!
– (يدخن في سبسيه)
– تي ال** شني انت مهبول؟؟ تي نكلم فيك من الأول بإحترام وتمشي فيا لين تخليني نعلق!؟ تي مافيكمش واحد يقرا عربي ال** مكتوب عالباب (قاراج يفتح يوميا) بأكبر خط ال** من الحيط للحيط وماحد فيكم تعب روحه يطقطق ويستناني نطلعها؟؟ تو مش هكي سكرت على ** *** الباب وحبستني اشبح قداش وغضوة عيد والله اعلم امتا تولو!؟؟
– يا أخينا حني كلمونا وجينا بنخدمو وسيارتك قتلك تطلع وبعدين الل…… .
– (قاطعته) تي ال** ماتطلعش ياراجل ماتهبلنيش راهي سيارة مش دبابة تي كيف تفكر ياسبحان الله ومازال تقولي تطلع!!
– (تجاهل تام)
– (خشيت وطربقت الباب وراي)
شوية وجاري يشرين عالحوش.. ننزل نلقى (المهندس) ضرب طوبو المجاري وزايدين مكبرين الحفرة قدام القاراج على وسعها وشوية ويطقو في المرشابيدي الثاني، لا ويبو نجيبولهم حني الطوبوات! يعني جاي حضرة جنابه يحفر ويكسر وهو اصلاً طوبوات ماعنداش! وجاري يقولي لا حتى حني لما خدمولنا الطوبو جبنا طوبواتنا بروحنا، ويصححلي يعني وماحد تكلم قال إن هذا غلط، بل الصح إنك يا علي انت تجيب الطوبوات وترضى بالأمر الواقع.
IMG_20150922_113244
طبعاً هادي ابسط الأمور اللي تصير في ليبيا، حاجة والله تافهة وماتنذكرش ومفروض ماندووش حتى عليها، لكن كم الجهل والفوضى والعربدة اللي يصير منها يخليك تقول كيف هالناس مخليينهم هكي ماشيين يخدمو؟
عارف إن الموضوع لازم تتكيف معاه وعارف روحي مش في سويسرا، بس كل اللي نطلبه إن لما يصير الغلط تكلم وقول هذا غلط وخلي نعترفو بأن هذا غلط، وبعدين نتفاهمو على حل، لكن مش من الأول تقولي إنت غلط وتبيني نعتنق الفكر السادي المريض متعك متع إن هذا هو الصح ون أني نحلم ونقول في كلام خيالي!!
لا يا سيد!
الغلط قوله غلط، ونعترفو بيه غلط، حتى ولو أن البلاد خرابة وفوضى، لازم كل واحد فينا يكون تقييمه لنفسه إن اللي ايدير فيه غلط، وكل يوم ينوض الصبح يفكر كيف إن الغلط اللي داره آمس مضطر، يحاول يلقاله حل اليوم باش مايديراش، لكن المصيبة والهوّة العميقة اللي ماليهاش قرار واللي قاعدين نتسلحبو فيها لينا سنين، لما تقنع نفسك أن الغلط اللي ادير فيه هو الصح وإن أي حد يكلمك عليه تقوله لا في وجهه!! هني تنقلب الموازين وهني إنت عدوي اللدود إلى أبد الآبدين!!
حسبي الله ونعم الوكيل. إلى أين المفر.
* مرفق صورة الوادي اللي حفروه قدام القاراج واللي صاحبنا يقولي سيارتك تطلع منه!
* مرفق صورة للطوبو واللي على خاطره حافرين وادي!
* الرجاء ملاحظة “الجريدة” المكتوبة على المدخل، والمزينة بالحركات والتنوين!
أليس منكم رجل رشيد؟ هذا لسان حالي، والمهندسين المقصودين بالقول ماشاء الله عليهم 7 + 1 على الكاشيك يخدم، ولا واحد فيهم إحترم ال*** حاشاكم اللي طلع يبي يطلع سيارته، واللي حبسوهاله بقوة الجهل، إلى ماشاء الله.
وفي النهاية عادي معتبرها في الورشة ودفع بلاء والحمدلله، بس الغلط لازم نقولوله غلط والصح نقولوله صح، وفعلاً من ناحية إن جو وصلحو الطوبو هذا شيء إيجابي والحمدلله إنه شي قاعد ايصير، لكن في نفس الوقت الموضوع مش هكي دفان وعرقلة ولما نجي ننتقدك تبي تسكتني تقولي تي قول الحمدلله ناس جاية تخدم!!! (عارف في منكم هلبا حيفكرو هكي).

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *