وهم المعرفة : لماذا يتكلم البعض خارج اختصاصه ؟

[مالك]

في وسائل التواصل الاجتماعي وحتى في الواقع نشوفو في ناس تتكلم في كل شي وتعطي في رايها وتقيم في غيرها .. المشهد مألوف للكل على ما أزعم وأظن.
ولكن !
قابلني من فترة شخص معروف على وسائل التواصل الاجتماعي ... صاحب اكثر من صنعة
لكن على ما يبدو لا يتقن أي منها.
يقدم في معلومات مصدرها شوية بحث + شوية تحوير وخلط مصطلحات ويطلع بشطحة.
حتى هنا عادي , في خاطري نقول عادي يغلط ويجي شخص ثاني يصححله !
صح ؟
صح .. لكن !
اللي يصححله يطلعه غالط وغبي ومتخلف وجاهل ويستهزئ بيه ويديره محتوى !
الثقة اللي عند الناس هذي غريبة !
حتى مع تكرار أخطاء هؤلاء الناس وبيان حقيقتهم , تبقى صورتهم وجمهورهم يزيد مع الوقت !
الناس تسمع منهم وتصدقهم بدون الحاجة لأنهم يدعمو كلامهم بأدلة , ربما يقدمو في مصادر لكن باقتطاع النصوص وتجزئة وتحريف الكلام أو بتقديم معلومات قديمة تم إثبات عدم صحتها أو حدثت تغييرات لاحقة فيها.
النت خلّى أي شخص يتكلم في أي موضوع ويناقش متخصصين وخبراء ويغلطهم .. ويقلل أدبه أيضا بدون محاسبة !
لما يكون كلامك هو مجرد راي شخصي .. ربما مايهمنيش ولا نعطيه اعتبار.
لكن لما يكون تعدي ومحاولة لفرض هراء .. هنا وقّف !