قبل شراءك لمنظومة طاقة شمسية

[علي الطويل]

الفترة الماضية زاد الوعي بالمنظومات الشمسية، ولكن في نفس الوقت زاد الاستغلال لجهل الزبون، وعارف أن منشوراتي مش حيقراها كل الشعب الليبي، وزيدها للأسف شح الإنتاج المعلوماتي من أغلب الخبراء وقلة اهتمامهم بتوعية المواطن، ونظرا لغياب الجهات الرسمية عن ساحة التوعية، وطبعاً لا وجود لأي جهة لحماية المستهلك بشكل حقيقي، فبكل أسف حنستمرو في إنتاج هالمحتوى ونشتغلو شغلهم، وباللهجة العامية باش توصل الرسالة لأكبر شريحة ممكنة من الناس.

موضوعنا اليوم يمس حقوق المستهلك، وياريت نتعاونو مع بعض باش توصل الرسالة للكل، نبي جهدكم في مشاركة هالمنشور، لأني خايف من رد فعل سلبي من الناس ضد الطاقة الشمسية والجدوى منها خلال السنة الجاية والسبب أن الفترة الأخيرة خشت هلبا شركات لسوق الطاقة الشمسية، ومنهم من جاب للسوق مشاكل وتضليل وخداع، والحقيقة مش عارف هل السبب جهلهم أم ذكائهم في الاستغلال؟

شبحت إعلانات لمنظومات طاقة شمسية فيها 2 إنفيرترات قدرة 5kw على اساس انها منظومة 10kw بالرغم من أن المنظومة فيها ألواح شمسية تشحن 2kw فقط او اقل، ومعاها بتاريات للفترة الليلية تخزن 10kw فقط!

يعني لو المستهلك شغل 10kw حيصفّر البتاريات في أقل من ساعة، وهندسيا المنظومة هادي فيها خطأ من ناحية التصميم وحتضربلك البتاريات خلال أقل من سنة ونص.

الألواح اللي حاطها مصمم هالمنظومة تنتج 2kw في الساعة ولا تكفي الأحمال، ناهيك عن أنها تحصل كيف تشحن البتاريات.

وظيفة الألواح إنتاج طاقة تكفي الأحمال ويكون معاها فائض لشحن البتاريات، والبتاريات مجرد تخزين للكهرباء في الليل ويتم تصميمها باش تعطي الأحمال اللي يطلبها الزبون بعدد الساعات المطلوبة.

وحنقولك كيف يتم قياس قدرة منظومة الطاقة الشمسية سواء كانت 5 أو 10 او حتى 20 kw ؟

إذا كانت المنظومة فيها إنفيرتر 10kw، والواح تشحن 2kw كل ساعة، وبتاريات تخزن في حدود 10kw ساعة، فلازم تعرف أن هالمنظومة هي منظومة 2kw تم بيعها لك (من قبل بعض الشركات سامحهم الله) على أساس أنها منظومة 10kw، وكذلك لازم تعرف أن هالمنظومة في الليل حتشغلك 10kw لأقل من ساعة واحدة، وفوق منها هالبتاريات في هالتصميم الغلط حتفسد في فترة قصيرة جداً لأنك حتصفّرها عالأخير.

المهم، حني توا نبو نحاولو نفهمو علاش هالمنظومة غلط ولازم نتفقو ونفهمو أن المنظومة مكونه من 3 أجزاء:

1. ألواح شمسية مسؤولة عن توليد الطاقة خلال النهار من سطوع اشعة الشمس (مش حرارتها).
2. انفيرتر مسؤول عن قداش كيلو وات (kw) نقدر نشغل في نفس الوقت (كم جهاز تقدر تخدمه في نفس الوقت).
3. بتاريات مسؤولة عن تخزين الطاقة لأحمال الليل (كم ساعة تبي تشغل الأحمال متعك في الليل؟).

لهذا،

تسمية المنظومة بحسب الانفيرتر وعدم وضع ألواح شمسية للشحن بما يناسب حجم الانفيرتر، وعدم وضع بتاريات مناسبة لتخزين القدرة المراد الاستفادة منها في الليل، تعتبر طريقة تجارية ومعاها خطأ شنيع يسبب في عطلها بعد فترة وجيزة من عمرها الافتراضي.

مثال لحساب المنظومة بشكل صحيح:

إذا كان إجمالي الأحمال اللي تبي تشغلها في الحوش هو 6kw في الساعة، يعني مثلاً حوش فيه زوز مكيفات 18 BTU وإضاءة LED وثلاجة وحدة وزوز تلفزيونات، وشواحن، وراوتر إنترنت، وكمبيوتر.

فلازم يكون شحن الألواح أكبر من هالقيمة باش يقدر يشغل كل هالأحمال ومعاها يشحن البتاريات لفترة ما بعد غروب الشمس، ولهذا 8kw قد تكون مناسبة.

أما البتاريات فلازم تكون تستوعب تخزين هالكمية من الطاقة مضروب في عدد الساعات المراد تشغيلها، وكلما كان الاستخدام مقنن ومحدد زادت ساعات التشغيل في الليل، يعني بتاريات تخزين 40kw في الساعة مثلا قد تكون مناسبة، وإذا تم تقنين الاستخدام ليكون في حدود 3kw في الساعة، حيكون مخزون البطاريات كافي ل 9 ساعات تشغيل مستمرة وبدون ضرر.

اخيرا لازم يكون الانفيرتر أكبر من 6kw، وهنايا ال 10kw مناسب، لضمان تشغيل سلس.

هالمنظومة حتكون منظومة بقدرة تشغيل قصوى 10kw، مع شحن ألواح 8kw مثلا، وبتاريات بتخزين 40kw في الساعة.

أما لقطة أن يكون الانفيرتر 10kw مع شحن ألواح 2kw وتخزين بتاريات 10kw، فهذا تصميم خطأ، ونعتبره تضليل وخداع لأنها في الحقيقة منظومة 2kw، ومن الخطأ مقارنتها بمنظومات 10kw بس هالشركات تستغل في جهل الناس وتحطلك منظومة 10kw بسعر منظومة 2kw وإنت تشوف السعر رخيص تمشي تجريلها، لهذا إحذر.

ملاحظة:
هذا مجرد مثال من الواقع، بس ما تاخداش حرفياً وتمشي بيه لشركة وتقوللهم قالي واحد اسمه علي الطويل في الإنترنت هادي منظومة تشغل زوز مكيفات 18 ونبيها هكي!!! لأن الأجهزة تختلف من شركة لشركة وكل جهاز ومعدل صرفه وكل حوش والعيلة اللي فيه وطريقة استهلاكهم تختلف لهذا استفيد من المعلومة وما تاخدش الأرقام حرفياً وديما استعين بالخبراء، وهالارقام اللي نحط فيها في منشوراتي هي مجرد أمثلة قريبة جدا للواقع.

الخلاصة:
لما بتشري منظومة طاقة شمسية لازم تعرف تفاصيل المكونات الثلاثة اللي ذكرتها وآهو نزيدو نعاودوها ثاني:

1. الانفيرتر هو اللي يحدد أقصى قدرة يمكن تشغيلها في نفس اللحظه فقط ولا يعطي تفاصيل كافية عن المنظومة.
2. الألواح الشمسية تولد الطاقة من سطوع أشعة الشمس (مش حرارتها) ولازم تغطي الأحمال وتشحن البتاريات، يعني تعطي طاقة أكبر من او يساوي الأحمال.
3. البتاريات مهمتها تخزين الطاقة الكافية لتشغيل الأحمال المطلوبة في فترة الليل للفترة المطلوبة، ويختلف عددها وحجمها حسب ساعات التشغيل المطلوبة.

معلومة:
المواضيع هادي هدفها هو التوعية فقط، ما فيش حد يدفعلي مقابلها، لما تنشرها من طرفك فأني ما نستفيدش مادياً، بس حنستفيد من دعوة خير، لهذا ما تحرموناش من دعوة خير وأنشرو وساهمو في نشر المحتوى المفيد على الإنترنت.

[أحمد الغرباوي]

بارك الله فيك يا خوي علي

[عبدالفتاح القماطي]

بارك الله فيك .. كل شئ جديد في البداية يكون غالي ويعرفه إلا المتخصصين فيه.

لكن عندما تكثر الشركات الموزعة في السوق والناس العامة تستعمله أكثر ...يستطيع العامة معرفة المزايا والعيوب لكل من منتح ومشروعات الطاقة الشمسية تحتاج لشركات تغامر وتدخل السوق لانها مفيدة في ليبيا ومناسبة للتاجر والمستهلك.