صفحة 1 من 1

لامبات الLED وتأثيرها عالإستهلاك

مرسل: الأحد 09 مايو 2021 - 1:24
بواسطة علي الطويل
غيرت لامبات الحوش كله (قريب 40 لامبة) الى لامبات نوع LED (مش النيون) والنتيجة كانت حذف 4 امبير من استهلاكي، يعني مايعادل قريب مكيف 12 حصان.

حاليا تلاجة وفريز وتلفزيون وانارة مايفوتوش 3 امبير مع بعض، وقبل كنت نوصل 7 امبير، فلو كل حوش اقتصد وبدي يركز في صرف اجهزته ومش يشري الرخيص وخلاص فأكيد حيحسن وضع صرفه وسحبه من الشبكة.

عندي مكيفات تصرف فكهرباء عالية بسبب اني دورت الماركة وكفائتهم في التبريد ومش حاسب صرفهم في الكهرباء وهذا منطق لازم يتغير فينا.

يعني في الجديد مثلا بنشري سخان مية بنشوف قداش وات يصرف مش نروح بيه ونلقاه ما يعادل مكيف 22 حصان!!

حكاية كل شيء بلاش كهرباء وبنزينة ومية هادي حطوها وراكم وانسوها، فيقو لعمركم، خلاص بعد الفساد اللي شفناه في كل قطاعات الدولة، حكاية الترشيد في استعمال الكهرباء والمية والبنزينة بدت امر واقع، لهذا اعبى بروحك، اللي فوق مش شايفينك الا عالة عليهم.

وخلاص اني بالشوية بالشوية بديت نقتنع ان كل مواطن صالح هو في الحقيقة مواطن فاسد بس ماجاتاش الفرصة.

نحسبو كمثال 4 امبير على مليون حوش في ليبيا، يعني 4 مليون امبير.
نشوفو كم وات يجو..
الوات = الامبير × الفولت
الوات = 4,000,000 × 220
الوات = 880,000,000

يعني لو كل حوش وفر 4 امبير فحتوفر عالشبكة 880 ميقا وات، ولكن هذا جهد جماعي واغلبنا يكتب في تعليقات عاطفية وانهم مخانب وانهم كلاب وان والله لما نفتح الدفايات لما يجي الضي وغيره من القطاف الزايد اللي نتيجته ماتعطيش اي تغيير.

نبو تغيير يا جماعة، عيينا من الكلام.

(تم النشر على صفحتي في الفيسبوك هنا)