بناء محطات طاقات متجددة في ليبيا

المستقبل هو للطاقة الشمسية والرياح وأمواج البحار، وغيرها من طاقات نظيفة ومتجددة.
أضف رد جديد
صورة العضو الرمزية

كاتب الموضوع
علي الطويل
مؤسس المنتدى
مؤسس المنتدى
مشاركات: 17
اشترك في: الجمعة 09 أكتوبر 2020 - 21:09
المكان: طرابلس
الاهتمامات: تقنية، سينما، العاب
المهنة: تقنية وامن معلومات
اتصال:

بناء محطات طاقات متجددة في ليبيا

مشاركة بواسطة علي الطويل »

بالنسبة لموضوع بناء محطات طاقات متجددة بدل محطات المحروقات في ليبيا لقيت فئة من الناس تعلق بالتالي:
- الشعب الليبي حيخنب ويخرب ومش حيخليها سليمة.
- التكلفة عالية ومش مجدية اقتصادياً والمحروقات أرخص.

الرد على هالفئتين:
إنت أعرض عالعام عرضك وطلبك وخلي العالم يتنافس في تقديم الحل ليك بالمخاطر اللي عندك، بالمشاكل التقنية واللوجستية، كلها ليها حل، حيجوك ويدرسولك وضعك ويطلعولك الحاجات اللي إنت ما تعرفهاش لأنهم هم الخبراء.

بالله عليك استهدى بالله وقوقل كلمة ديزرتيك (بالإنجليزية: DESERTEC) وثقف نفسك في هالموضوع قبل لا تبدا ترد بردود سلبية على شيء أنت ما تعرفهاش.

ما تاخدش طاقية السلبية وتكبش فيها، إنت مقعمز ضاربك الصهد ونقولولك بنركبولك مكيف وقاعد تقول لا ماهو الجيران بيخنبوه، لا ماهو تو بيطيح على راسي لا ماهو غالي لا ماهو بيصرف لا ماهو صيانته هلبا لا ماهو شن بينوضني من مكاني خليني قاعد زي ما أني لا ماهو ماهو ماهو ماهو!!!

حتى مقترح أونلاين نلقو ليه معارضين، والناس هادي للأسف مش عارف شن اللي خلاها هكي، هل فاهمين حاجة حتى العلماء مش عارفينها ولا شني بالزبط؟

إنت حتى لو بتحسبها بالإحتمالات تلقى التغيير أفضل من الركود!!!

- لو قعدت زي ما أنت شن حتستفيد؟ لا شيء. شن حتضرر؟ قاعد الضرر يزيد.
- لو تحركت شن حتستفيد؟ حالك يتعدل. وشن حتضرر؟ مش حيكون ضرر أكبر من اللي صايرلك حالياً.

في ناس مشغلة محطة فضاء في مدار الأرض ليها 22 سنة و7 شهور و15 يوم حتى تاريخ هذا المنشور وما تشتغلش بالمحروقات هالمحطة وموجودة في أعنف بيئة ممكنة في الوجود ألا وهي الفضاء الخارجي اللي ممكن جسم في حجم حبة رز يثقب جسمها ويسبب في كارثة، ومع هذا قاعدة مستمرة وتشتغل ولكل مشكلة عندها حل وما حد قال ياراجل مش مجدية والبشر حيخربوها وغيره من العراقيل النفسية، لأنك ما درست الشي عن طريق الخبراء.

مشكلتنا مش مشكلة فلوس وأمن ومش عارف شني، مشكلتنا بالأساس أن الناس ماتبيش حالها يتغير، ولا تبي تغير من نفسها، زي المريض اللي ما يبي يمشي للدكتور بحجة أن وأن وأن وأن لين يستشري المرض ويموت ويخلي وراه ناس تعاني، والله لا يغير ما بقوم حتى يغيرو ما بأنفسهم.

مصادر:
https://en.wikipedia.org/wiki/Internati ... ce_Station
https://ar.wikipedia.org/wiki/%D8%AF%D9 ... 9%8A%D9%83
مدير ومؤسس المنتدى، تجدني على https://about.me/alitweel
أضف رد جديد