أنت تحب الأندرويد؟ أنت تحب IOS؟

[علي الطويل]

من علامات النضج:
- أنت تحب الأندرويد؟ تعرف من أحسن الانظمة ومادام يلبي احتياجك ممتاز ربي يباركلك.
- أنت تحب IOS؟ معروفة راهو من أحسن الانظمة ومادام يلبي احتياجك ممتاز ربي يباركلك.


من علامات صغر العقل:
- أنت تحب الأندرويد؟ نظام معاق، وكله مشاكل وبرامج وهمية وأديروا ما ديرو حتقعدو ميتين وراهي مش مهم هادي درتوها أنتم الأولين المهم حني درناها صح.
- أنت تحب IOS؟ تي نظام عاهة مسكر ومش عارف كيف تخدموا بيه أصلا متع وهميين وجو الشو، تعالا للحرية متع الأندرويد وفكك من العار متع الIOS.


من علامات الشخص الفاهم:
- أنت تحب الأندرويد؟ شوف، الأندرويد نظام ممتاز ومتوفر على هلبا اجهزة يعني تقدر تختار التلفون اللي يناسبك من شكل ولون وقدرات ولازم تعرف شن البرامج اللي تنزلها وتستعملها، وراهو باختصار هو كمبيوتر حقيقي في جيبك ما فيش حاجة ما تقدرش اديرها بيها، لدرجة أنك تقدر حتى تفسده! ولا تمسح نظام التشغيل وتنزل نظام غيره، يعني تلعب فيه كيف ما تبي وبراحتك! ولما عندك تلفون اندرويد، تبدا عندك حرية الاختيار، لأنك مش مقيد بنظام بيئي مسكر، يعني غضوة الشركة نزلت نسخة حديثة من تلفونك بس شاشته ما عجباتكش أو نحو البصمة منه أو دارو الكاميرا اشبح كيف ولا ماطوروشي زي ما تحب، فعادي تقدر تغير على شركة ثانية ونفس تطبيقاتك ومشترياتك من متجر قوقل بلاي تنتقل معاك للتلفون الجديد، يعني لو عندك ساعة أو لابتوب رابطه مع التلفون، أنت مش مقيد بنوع معين، كلها عادي بتنتقل معاك، لكن بتركز في لقطة التوافقية بين كل اجهزتك، لأن الشركات تقول متوافق لكن مش متكامل، وهذا طبيعي لأن كل شركة بتركز في موضوعها مش حتقدر ادير توافقية بين كل اجهزة كوكب الأرض إلا لو في اتفاقية موقعة وتقنية تطلع زي البلوتوث والWifi Direct وغيرها، وطبعاً مع اندرويد حتستمع بالاختلاف الجميل والتطور في التقنية بدون ندم أو انتظار لسنتين أو ثلاثة أو خمسة باش تستمتع بتقنية معينة، بس المطورين للتطبيقات لاقيين صعوبة في التعامل مع الأندرويد، لأنه آلاف الانواع من الأجهزة بمختلف الأحجام والمزايا وأصدارات النظام مختلفة في كل فئة لهذا تطبيقات الأندرويد ما تلقاهاش تطلع بسرعة عالمتجر والمطورين مش مهتمين بيها بقدر التطوير لنظام IOS بل أن في مطورين ما ينزلوش على الأندرويد اصلاً ومتفاديين صداع الدعم والتطوير لكل أجهزة أندرويد.

- أنت تحب IOS؟ به أكيد معناها تعرف أنه نظام مسكر وتجربة المستخدم فيه تحمي فيها شركة Apple وتتحكم فيها من مرحلة التصميم، ومن الصعب أنك تلقى آيفون يولي بطيء، أو أداءه مش كويس، لأن الشركة تصنع في الهاردوير للسوفتوير متعها مش العكس، والتطبيقات قبل ما تطلعلك في متجر البرامج للناس، يتم مراجعتها مش على مستوى الكود ولو فيه حاجات خبيثة بل حتى على مستوى الأداء باش المستخدم المش فاهم ما يقعدش يقول الآيفون ما ينفعش بس لأن مطور تطبيق معين ما خدمش خدمته كويس وخلى التطبيق اللي نزلته رزين أو يستك أو يخلي الجهاز يولي بطيء، الشي اللي نشوفو فيه عالأندرويد، بس مقابل هالشيء، فأنت ملزم باللي تنزلهولك الشركة وغضوة تنزلك تلفون فيه مدخل شحن جديد بتضطر تغير كل خيوطك، لأن من الصعب تطلع من النظام البيئي متع النظام خصوصا لو عندك ساعة ولابتوب وشاحن وكماليات من شركة Apple مستثمر فيها وما تبيش تغيرها، كذلك المطورين لتطبيقات الIOS تلقاهم يفضلو يخدمو تطبيقهم على هالنظام أولاً لأن الأجهزة محدودة ومعروفة وديما نظام التشغيل متعها حول العالم يكون حديث عالأقل أصدارتين ولا إصدار بس قديم.

- صح الأندرويد فيه مزايا هلبا مش موجودة في الIOS مزبوط، ولكن ليه مستخدميه اللي ماشي معاهم، كما أن الIOS نظام مختلف وسياسته مختلفة، ويستنى الميزة لين تنتشر في السوق بعدين ينزلها بتوافقية بين الMac وال iPad وال Apple watch وباقي النظام البيئي الخاص بشركة Apple وإنت ليك حرية الاختيار حسب حاجتك وجوك لما تبدا عارف كل نظام وشن قصته وهل تمشي مع اسلوب حياتك او لا، لهذا لما حد يسألك على شن يختار، ما تقولاش يشري الشي اللي يمشي معاك أنت، لأن أنت مش أني ولا هو، وبشكل عام لو تبي تلفون ومش عارف شن تشري.

نعم في حاجات لا تغتفر من وجهة نظرك، لكن حتقعد وجهة نظرك، عبر عليها زي ما تحب لكن ما تفرضها على حد كحقيقة مطلقة، أما لو كنت شخص مؤثر وعندك شريحة من الناس تسمعلك فلازم تلتزم بالمهنية العالية وتقول رأيك "المفيد" لغيرك لما بتنصح، وخلي دوة التريبونات للناس اللي تحركها المشاعر واللوكلوك والبونتوات.

تم النشر على فيسبوك من هنا.