كيف ترجمت المقطع للعربي؟

[علي الطويل]

كيف ترجمت المقطع للعربي؟؟

هذا كان سؤال جاني على قناتي في التلغرام (https://t.me/alitweelblog) بعد ما نزلت فيديو أنجليزي مع ترجمة عربية، فقلت نديره موضوع بروحه باش يستفيد غيري من باب أن في من تقابل فيه فيديوهات مفيدة ويبي ينشرها لكن مش عارف؟

كذلك، بالك في حل أفضل وأسهل تشاركوني بيه في التعليقات؟

في هلبا فيديوات توعوية ممتازة، ولكن لصعوبة التواصل عند الاغلبية اللي مش قاريين انجليزي، نلقى في تعليقات تسأل هذا شني وعلاش تنشر بالإنجليزي كل ما نجي ننشر فيديو مش مترجم للعربي.

وللأسف خدمات الترجمة المجانية عالأغلب متوفرة لفيديوات قصيرة، ومرات نلقى فيديو طويل فوق من 15 دقيقة ومافيش حل نترجمه إلا لو ندفع فلوس، ولأني مانكسبش من وراء نشاطي على الإنترنت (تهرويك) باش نبرر الصرف عالاشتراكات، فعندي طريقة طويلة شوية، ولكن تنفع مع اي فيديو وتسمحلك تعدل وتراجع في كل خطوة.

1. أول حاجة استعملت موقع cobalt tools لتنزيل الفيديو. (https://cobalt.tools وكذلك في هذا https://yt1ss.pro)
2. ثاني شي استعملت تطبيق Clipchamp باش نستخرج الكلام المنطوق في الفيديو إلى ملف srt. (تطبيق https://clipchamp.com موجود مع ويندوز10 مجاناً)
3. استعملت موقع subtitlestranslator لترجمة الملف من الأنجليزي إلى عربي. (موقع https://subtitlestranslator.com)
4. أخيراً استعملت تطبيق Wondershare Filmora لدمج الترجمة في الفيديو (تطبيق https://filmora.wondershare.com) بعد تعديل الخط واللون، وتقدر ادير الدمج حتى بتطبيق Clipchamp كذلك.

اللي عنده طريق أسهل يكتبلنا تعليق، ويأكد لو تنفع مع الفيديوات الطويلة أو لا، وهل مجربها أو لا باش يختصر علينا ضياع الوقت في التجربة، ولو تعرف حد مجرب، ياريت اديرله مشاركة للموضوع هذا بالك يشترك في المنتدى ونستفيدو من بعض، وبارك الله في الجميع.