اسعار الكهرباء في ليبيا وحسبة مكيف 12

المستقبل هو للطاقة الشمسية والرياح وأمواج البحار، وغيرها من طاقات نظيفة ومتجددة.
أضف رد جديد
صورة العضو الرمزية

كاتب الموضوع
علي الطويل
مؤسس المنتدى
مؤسس المنتدى
مشاركات: 23
اشترك في: الجمعة 09 أكتوبر 2020 - 21:09
المكان: طرابلس
الاهتمامات: تقنية، سينما، العاب
المهنة: تقنية وامن معلومات
اتصال:

اسعار الكهرباء في ليبيا وحسبة مكيف 12

مشاركة بواسطة علي الطويل »

سنة 2020 كانت اول مرة نعرف اسعار الكهرباء في بلادي، لأني من 2008 لما تزوجت وسكنت بروحي وأني تجيني فاتورة نخلصها وتمت.

حسبت تكلفة تشغيل مكيف 12BTU (وحدة حرارية بريطانية) يصرف في 1.06 كيلو وات في الساعة، لمدة 8 ساعات في اليوم طلعلي السعر كالتالي:
- في اليوم 0.17 دينار
- في الشهر *30= 5.1 دينار
- في السنة *12= 61.2 دينار
electric price.jpg
طبعاً المنطق يقول أنك مش حتشغل المكيف طول السنة، وإنت عالأكثر حتشغله فصل الصيف اللي هو 3 شهور، يعني 0.17 د * 90 يوم = 15.3 دينار في السنة حيكلفك.

لكن لو في فصل الشتي تستعمل فيه دفاية، فأكيد تضرب الرقم هكي 0.17 د * 180 يوم = 30.6 دينار في السنة.

لو مثلاً عندك مخزن وتبي تشغل المكيف هذا طول السنة بلا إنقطاع، كيف نحسبوها؟ أهو نقولك يعني 1.060 كيلو وات في 24 ساعة في 365 يوم يطلعلك 186.15 دينار في السنة.

هذا مكيف واحد بس قوته 12BTU، وهادي تكاليفه حسب الوضع اللي عندك، ووالله الكهرباء عندنا رخيصة مقارنة بدول ثانية.
hommer cost.jpg
===============================================
إنت هكي خذيت الزبدة، بس لو تبي تفاصيل وإدير كل شي بروحك، كمل معاي..
===============================================

الحسبة لو تبي إديرها بروحك، شوف الخطوات هادي:
1. طلع الجهاز متعك كم يصرف كيلو وات في الساعة Kwh.
1.1 لو مش مكتوب الكيلو وات، خود الفولت أضربه في الأمبير يطلعلك وات، قسمه على 1000 يطلعلك كيلو وات ساعة. (يعني شاحن موبايل 5 فولت في 2 أمبير يطلعلك 10 وات اقسم على 1000 يطلعلك 0.01 كيلو وات ساعة، أو مثلاً دسكتوب 220 فولت في 4 امبير يطلعلك 880 وات اقسم على 1000 يطلعلك 0.88 كيلو وات ساعة، ومثلا أخير مكيف اكيد 220 فولت في 8 امبير يطلع 1760 وات اقسم يطلع 1.76 كيلو وات ساعة)
2. اضرب الرقم في كم ساعة تبي تشغل الجهاز هذا في اليوم.
3. اضرب الرقم اللي طلعلك في كم يوم في السنة حتشغله.
4. اضرب الرقم في 0.02 اللي هو (20 درهم) تكلفة الكيلو وات في الساعة للمنازل، أو شوف التسعيرة متعك حسب الجدول المرفق واحسب عليها.

أكثر من هكي معلومات راصك حيدخن لو جديد عالموضوع وماتحبش الحساب لهذا نكتفي بهذا القدر، وتحية حب وإحترام وتقدير لكل من يقرا كل المنشور ويبحث بروحه ويراجع معلوماتي ويحاول شوفني هل غالط أو لا.

#معادلات:
الأمبير = الوات / الفولت
الفولت = الوات / الأمبير
الوات = الفولت × الأمبير

طبعاً علاش هذا كله والحساب؟ لأنك قريباً حتكتشف أن المولد حل مؤقت لمشكلة الكهرباء ومش وسيلة حياة وراهو زي الموت البطيء، تصرف شوية شوية كل يوم وشهر وسنة وفي الأخير استثمار مش مستدام، وصرف زايد عالمدى البعيد بين زيوت ونافطة وبنزينة وفلاتر وشماعي ولوحات ولفات وصيانة وتشحيط ورا المحطات ومش حتقدر تشغله ساعات طويلة، وأن المنظومة الشمسية هي الحل الإقتصادي الأمثل عالمدى البعيد واللي حتساعدك في تقليل تكلفة صرف الكهرباء عندك واستمراريتها بدون إنقطاع.

زيد دير دورة عالموضوع هذا باش تكتشف أن المولد طياح سعد على المدى البعيد، وماهو إلا حل مؤقت بس، ولأن وضعنا مش مؤقت وقاعدلنا، لهذا التحويل لحل مستدام هو الارخص على المدى الطويل: viewtopic.php?t=4

وطبعاً لازم من الترشيد لو بتحول على خارج شبكة الكهرباء للدولة، أنسى حكاية افتح كل شي مع كل شي طول الوقت، تبي تفتح اللي تحتاجه فقط، وهذا مفيد للبيئة ومفيد لغيرك اللي محتاج لكهرباء الدولة طول السنة، ما تكتبليشش تعليق أن البطاريات والطاقة الشمسية حل ضعيف، لأن هذا حقيقة ومعروفة، مش زي الطاقة الشمسية زي كهرباء الدولة اللي تفتحها طول الوقت على طول السنة من غير تخميم.

#ملاحظة: أنا لا أتبع أي شركة أو تجارة بالخصوص، أني مدون قديم جداً نكتب عالإنترنت من بدايات دخول الإنترنت في ليبيا سنة 2000 و #هرواك بالوسام الألماسي لأني طول عمري عالإنترنت نعطي بدون مقابل مادي بل مقابل #التوعية وإفادة غيري ومجتمعي.

نورنا بتعليق على هالمجهود والمعلومات، وشاركه صحابك

مصدر الأسعار:
https://www.gecol.ly/ElectricityBill.aspx
مدير ومؤسس المنتدى، تجدني على https://alitweel.ly/social

أحمد الغرباوي
عضو جديد
عضو جديد
مشاركات: 6
اشترك في: السبت 12 مارس 2022 - 11:30

Re: اسعار الكهرباء في ليبيا وحسبة مكيف 12

مشاركة بواسطة أحمد الغرباوي »

بارك الله فيك
أضف رد جديد