تخطى إلى المحتوى
الرئيسة » المدونة » قصة منظومة طاقة شمسية!

قصة منظومة طاقة شمسية!

بنحكيلكم اليوم وبالفلاقي، على تحليل لمنظومة شمسية، باش نبسطلكم الفكرة اللي الكل خايف منها ويقول المولد خير منها، وطبعا مش حنحكي تفاصيل تقنية باش ما نوجعلكش راصك.

والمنظومة المقترحة مواصفاتها كالتالي:

  1. انفيرتر 5Kw
  2. عدد 8 بتاريات 250ah 10hr.
  3. عدد 12 لوح شمسي قدرة 335w.

التكلفة التقريبية لهالمنظومة هي.. 25 الف دينار ليبي، بس وقف شوية قبل ما تطلع!!

كمل القرايا لأن ما زال عندي قصة بنحكيهالك ما قالهالك حد قبل، وبنعطيك شوية ارقام في الأخير باش نقربلك التكلفة العالية هادي، المهم المنظومة هيا عندها القدرة على تشغيل:

  1. إنارة منزل كامل (مصابيح LED)
  2. مراوح عادية
  3. شاشة 46 إنش و رسيفر
  4. ثلاجة
  5. فريز
  6. غسالة ملابس
  7. مكيف 12 BTU ويفضل نوع انفيرتر
  8. مضخة ماء
  • متوسط عدد ساعات التشغيل التقديري خلال الليل 10 ساعات.
  • متوسط عدد ساعات التشغيل التقديري خلال النهار 5 ساعات.

القصة وما فيها

تو خود الكلام اللي ما يقولهولكش لما بيشرحولك على منظومة شمسية واللي تخلي في الناس تخاف.

ريت لقطة تي كيف منظومة ب25 الف وما تشغلنيش 24 ساعة؟؟؟ ومعقولة تشغلني 10 ساعات بس؟؟ هادي هي اللقطة اللي مش كل حد فاهمها واللي للأسف الخبراء متجاهلينها ومخلية الناس تنفر من المنظومة الشمسية.

الحسابات اللي مكتوبة على اي منظومة طاقة شمسية، عادة تعني تشغيل مستمر لكل الأجهزة، يعني يحسبولك اسوأ أحتمال ووضع، وأكبر مصيبة لأي منظومة طاقة شمسية هي الأجهزة الكبيرة زي المكيف والكوشة والفرنيلو، بس لما يكون في شمس فعادي اللي بتعطيهولك الالواح بتستعمله والباقي تشحن بيه بتارياتك، بس المشكلة كلها في البتاريات في الليل وعمرها الافتراضي.

أنت في الواقع قداش حتقعد مشغل غسالة الحوايج؟ ساعة ولا نص ساعة ولا؟ وبومبة المية ممكن 10 دقايق أو ربع ساعة متع دوش؟؟ والتلفزيون بتقعد فاتحه 24 ساعة؟ اكيد لا! باهي والمكيف بتفتحه على ال 16 لمدة 24 ساعة؟؟ طبعاً لا! وهذا كله بتشغله في الليل ولا في النهار؟ وكله مع بعض ولا كل مرة جهاز؟؟

آهو نحكيلك على سيناريو يومي:

الصبح

تنوض الصبح الساعة سبعة، الضو هارب، بس الشمس كيف بادية تزرق، وال12 لوح شمسي باديين يدخلولك في 300 واط تقريباً، وكيف باديين يشحنولك ال8 بتاريات.

تنوض تعبي ماكينة القهوة سيفيرين اللي قوتها 800 واط بالمية، وتحط بن في البراتشو وتصب حليب في المق وتبدا تسخن ميتك وتنزل قهوتك وتسخن حليبك بالبخار وتصب وتطلع لسيارتك وتتسقد لعملك.

الصغار كانهم عطلة ينفتحلهم التلفزيون 46 انش مع الريسيفر، ومع بعض ما يصرفوش ممكن 130 واط، ومعاها الإنترنت تخدم وعادي كان في يوتيوب الأطفال أو لابتوب أو غيره.

مع العشرة ونص، الشمس تبدا سطوعها وزاويتها على الالواح الشمسية أعلى وتبدا الالواح تنتج في فوق ال 1800 واط بالراحة وتستمر بالارتفاع لصلاة الظهر وهي الأقصى.

غسالة الماعين نوع بوش، قوتها 2400 واط، تكون معبية اماعين وتنحط على برنامج الساعة وتشغلها.

خلال هالوقت، المكيف الGREE قوة 12 BTU بتقنية الإنفيرتر يكون مفتوح على ال 27 ويبدا يسحب في 1100 واط وبعدين ينزل بالشوية لين يوصل لل300 واط لما تتعدل حرارة الحوش، والالواح الشمسية مستمرة في شحن البتاريات اللي طول الليل كانت تخدم، وهكي المنظومة تخدم بطاقة قصوى اجمالية 3500 واط وتنزل وتركب حسب قوة تبريد المكيف ودورة عمل الغسالة.

الظهر

طبعاً بتارياتك طول الليل كانت تشغل في الفريز والثلاجة وتعطي في 300 إلى 450 واط طول الليل لأن ثلاجتك وفريزك يخدمو ترموستات تخدم وتطفى متع كل نص ساعة تقريبا.

مع ال12 الظهرية العويلة يفتحو الفرنيلو ويبدا تطييب الغدي ومعاها المكيف يخدم، وشفاط المطبخ يخدم والإنارة عادي تخدم وغسالة الماعين تكون كملت غسلتها.

في هالوقت مرات يكون ضو الشركة العامة للكهرباء جي ويبدا شحن البتاريات اسرع ومرات تفتح حتى غسالة الحوايج وباقي المكيفات، ومرات لا، وحني حنحسبوها أنه ماجتش الكهرباء من الشركة.

تقدر في اي وقت تبي تشغل غسالة الحوايج أو بومبة المية أنك توقف المكيف أو تنقص الفرنيلو شوية باش توزع إنتاج المنظومة وماتخليهاش تخدم بطاقتها القصوى.

عادي جدا تفتح بومبة المية متع 10 دقايق باش غسالة الحوايج تعبي بسرعة وبعد ما تخدم الغسالة بتصرفلك ممكن 700 واط وهي تغسل وبعدين بتنقص لل 350 واط وهي تعصر.

العشية

مع العصرية الغدي طاب وتغديتو والماعين والحوايج انغسلو، والبتاريات مفروض يكونو انشحنو وقدرتهم 100% وإنت روحت من العمل ودوشت وامورك تمام، بس الشمس سطوعها بدي ينقص والالواح مع الخمسة تقريبا يبدا انتاجهم يعطيك 1600 واط بالكثير لهذا، المكيف من الأفضل أنه يتسكر.

طبعاً طول الوقت الثلاجة والفريز ما يتسكروش، والإنارات إنت وجوك، والتلفزيون والريسفر والإنترنت يخدموا.

الليل

مع الليل، افتح فرارة وسط الحوش وفرار في دارك ولا دار الصغار مع التلفزيون والثلاجة والفريز وانارة الديار، يتعدل صرفك إلى 500 واط فقط، وهذا المعدل مع ال 8 بتاريات قوة 250ah 10hr يسمحلك بالتشغيل حتى 20 ساعة بدون شمس!

لكن البتاريات لما يكون مكتوب عليهم 10 hr يعني عدد ساعات التفريغ اللي تقدرهم البتارية هادي، وإنت في كل الأحوال بيصبح عليك الصبح وبتجيك شمس ثاني يوم وبتشحن بتارياتك وتستمر دورة الحياة.

أهم شي إنك ما اطيح بتارياتك تحت ال 70% لأن بتاريات الGEL تنضرب مع الوقت لو قعدت تفرغ فيها تحت ال 70% كل يوم، خلافا لبتاريات الليثيوم اللي تتحمل تنزل بيها حتى لل30%، لكن للأسف هذا النوع غالي جداً ومش متوفر بكثرة في السوق الليبي.

حافظ حافظ حافظ!

ما دامك في النهار ما تفوتش قدرة انتاج الالواح الشمسية، فديما حتقعد تاخد من الالواح والالواح ديما حتقعد تشحن بتارياتك، بس اول ما تخطم سحابة، أو جي ظل شجرة علي وحدة منها فالالواح معاش حيعطوك الطاقة القصوى، والحوش وأجهزته بتاخد من البتاريات لين تمشي السحابة وترجع الالواح تعطي للحوش وتشحن بتارياتك.

والالواح لازم تنظفها من التراب والغبرة كل اسبوعين مثلاً، لأن كفائتها حتنقص ومعاش تشوف الضو كويس لو عليها غبرة.

كذلك البتاريات مش تحطهم في البلكونة معرضين للحرارة، كل بتارية وعندها حرارة تخدم فيها بكفاءة، وعالأغلب في جو ال 27 درجة مئوية، المهم مش عالي هلبا فوق الأربعينات ومش تحت الصفر، وأفضل البتاريات هي الليثيوم، ولكنها غالية جداً في ليبيا وغير متوفرة بشكل كبير.

صارتلي مرة أن الحرارة برا ارتفعت فوق من ال 43 درجة وبالتالية ارتفع التيار الكهربائي اللي طالع منها وانخفض فرق الجهد (الفولت) والالواح لمدة نص ساعة توقفت عن انتاج الكهرباء (من ال12 ونص الظهر للواحد الظهر تقريباً) وبعدها رجعت تمام، والحالة هادي ماتصيرش إلا مرة أو مرتين في السنة في الصيف.

استثمار بعيد

الخلاصة إنك بتغير من اسلوب حياتك مع المنظومة، اللي مشكلتها الوحيدة هي التكلفة كلها بتحطها مرة وحدة، بينما لو قسمتهالك فحتحس بالموضوع مناسب.

طبعاً مع منظومة الطاقة الشمسية أنسى حكاية بتفتح كل شي مع بعض وطول الوقت وبإسراف، إلا كانش بتصنع محطة فحوشك وبتركب انفيرتر 30Kw وبتركب عشرطاش البتارية و64 لوح شمسي!!

هذا استثمار عالمدى البعيد، ال25 الف دينار اللي بتحطهم، لو استثمرتهم بشكل ممتاز وطول السنة، فبعد 5 سنوات حتضطر بس تشري بتاريات جديدة لأنها الشي الوحيد (خلافا للألواح والانفيرتر) اللي قاعد عمره ينقص بسرعة وكثرة الاستخدام، يعني مش حتشري منظومة جديدة كاملة بعد 5 سنين، لأن الالواح والانفيرتر قاعدين.

شوية ارقام

لو قلنا سعر ال8 بتاريات ال 250ah ب12 الف دينار ليبي، إنت بعد 5 سنوات حتشري بتاريات ثانية اقوى بنفس السعر يا نفس الأولات وبسعر اقل، لأن البتاريات قاعدة ترخص وسعتها تزيد كل كم سنة، وإنت الحقيقة ما تستعملش في البتاريات كل يوم طول السنة بل خلال سنة عندك 6 شهور بس اللي هي 3 شتي و3 صيف، اللي حيكون فيها انقطاعات للكهرباء لساعات طويلة، فبتارياتك حيكون عمرها (دورات حياتها) اطول ما دامك ما تنزلش فيها تحت ال 70%.

  • أول 5 سنوات إنت صرفت 25 الف دينار، يعني 5 آلاف دينار في السنة، يعني 417 دينار في الشهر، يعني 14 دينار في اليوم.
  • ثاني 5 سنوات إنت صرفت 12 الف دينار، يعني 2400 دينار في السنة، يعني 200 دينار في الشهر، يعني 7 دينار في اليوم.

الخلاصة

الموضوع فيه تفاصيل ليها أول ما ليهاش آخر، بس هادي كانت قصة واقعية، نتمنى تكون قرباتك من فكرة المنظومة، ونتمنى من الجهات والمصارف مساعدة الناس في تسهيل تكلفة المنظومة، لأن لو قتلك ادفعلي توا 25 الف دينار مش حتقدر، لكن لو جاك مصرف أو شركة الكهرباء وقتلك دير معاي عقد 10 سنوات، وكل يوم أدفعلي 14 دينار لمدة خمس سنوات، وبعدها أدفعلي 7 دينار لمدة خمس سنوات، فحتفكر في الموضوع بالتأكيد.

طبعاً العقود الطويلة هادي صعب على شركة خاصة إديرها، لهذا كلنا نعولو على المصارف والدولة في أنها تدعمها، أو على الأقل تدعم الليبيين اللي يبو يشروها على حسابهم الخاص، تعطيهم حوافز معينة أو تشاركهم في قيمتها أو غيره.

هذا الحل على مستوى ليبيا حيصنع محطات كهرباء فوق حياش الناس، والالواح الشمسية عمرها الافتراضي حتى فوق ال 20 سنة، وبعدها تبدا تنتج في كهرباء بشكل اقل، ما تفسدش، وتقدر تزيد عليها الواح اضافية، ولما تركبها اليوم حتبدا تعطيك لحوشك، وتشحن بتارياتك وفي المستقبل بعدين الفائض ممكن يطلع من ساعة الحوش ويمشي للشبكة العامة للشركة العامة للكهرباء، يعطي كهرباء لحياش غيرك أو يتخزن عندهم في محطات خاصة.

ممكن بعد كم سنة لما تستقر الشبكة، معاش تحتاج للبتاريات، وتبدا بتاريتك هي الشبكة العامة للكهرباء، ساعة الحوش في النهار تمشي بالعكس لما تعطي للشبكة، وفي الليل تبدا تاخد من الشبكة، كأن الشبكة هي بتاريتك، وممكن معاش تحتاج تركب بتاريات هلبا، وتركب بتاريات بسيطة تقعدلك لتشغيل حاجات بسيطة متع انارة وانترنت وأجهزة عادية.

نصيحة أخيرة، ماتاخدش بكلامي عالمنظومة هادي، الأسعار تتغير كل يوم، لهذا أمشي للخبراء وما تسمعش كلام الناس عالإنترنت وتبدا تشري وتركب وتدفع فلوسك في منظومة مرات ما تخدمش احتياجاتك، وبعدها كم سنة تلقى روحك حاصل وتجربتك سيئة، ولو اليوم إنت في صدد شراء مكيف أو غسالة أو فريز أو ثلاجة، حاول تاخدهم بتقنية الاانفيرتر، لأنك عاجلا أم آجلا جايها الطاقة الشمسية، ووقتها حتقعد نادم زيني أني توا وتقول ياريتني شريت هالفريز إنفيرتر راهو حيكون خفيف عالمنظومة وما يصرفش بدل ما تقعد تفكر تبيع وتشري جديد!

لو عجباتك المقالة، ما تنساش تشاركها صحابك، ولو لقيتني نسيت حاجة أو في شي يبي زيادة توضيح، ما تحرمناش من تعليقك، وتبعني على مختلف وسائل التواصل الاجتماعي، وفي النهاية، وكالعادة، هذا اللي عندي بنقولهولكم اليوم، إن شاء الله تكونوا استفدتوا، وإن شاء الله نكونوا معرفة خير.

3 أفكار بشأن “قصة منظومة طاقة شمسية!”

  1. بارك الله فيك وجزاك خيرا … كلام فى الصميم ومعظم الاسر الليبية فى اشد الحاجة لمثل هذه الحلول الجذرية والامنة والنظيفة والمتاحة نحتاج فقط الى توعية مجتمعية تشكل راى ضاغط على الحكومة لتبنى مسارات متعددة لحل ازمة الكهرباء واهمها الطاقة الشمسية وهذا ليس جديدا فكثير من الدول العربية وغير العربية سارت فى هذا النهج وكما تفضلت تعطى الحكومة قروض ميسرة للراغبين ومن يستطيع تقنين استهلاك الطاقة تقوم الدولة بشراء فائض الاستهلاك بالتخطيط السليم تتحول الازمة الى منفعة متبادله ومصلحة حقيقية يخرص كلا الطرفين الحكومة والمواطن على دوامها ونتخلص بشكل تتدريجى من هذا الاستنزاف المزرى لموارد الدولة هناك حقيقة مرة تفيد بان كثير من المؤسسات الخدمية فى ليبيا لن تستطيع القيام بواجبها مهما صرف عليها من اموال والسبب عدم المحاسبة والسبب عدم الامن والسبب عدم استقرار الدولة لما تمر به مت ازمة نعيش واقعها جميعا… والسلام

  2. السلام عليكم
    الصراحه ياخوي وجهة نظري الشخصيه انها غاليه مع الكلام الي قلته والتوفير والقيود ، ان مع الطاقه الشمسيه لكن من جهة اخرى مولد ال30k يكلف حوالي 24,000 دينار وتقدر حتى هوا تحافظ عليه وادير عليه تشك كل فتره في اعتقادي انه حيكلف زي الطاقه الشمسيه ولكن في المقابل تحصل اكثر طاقه وتشغل اكتر من حاجه في نفس الوقت.
    الطاقه الشمسية معاها لو الدوله تكفلت بيها واديرها مصدر طاقه شبه اساسي للمواطنين لانها حسب علمي طاقه ثابته او ع اقل توزيعها ع مناطق معينه لتخفيف الاحمال ع محطات الكهرباء بما ان مش لاقيين حل للكهرباء ع حسب قولهم.

    موفق خوي ومشكور على تدوينتك.

  3. السلام عليكم بارك الله فيك يامبدع ربي يحفظك .. انا شخصيا ً فهمت الكثير من الامور اللي كنت نجهلها عن الطاقة الشمسية .. في ميزان حسناتك أن شاء الله

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *