عبر وخلاصات 2017

عبر وخلاصات طلعت بيها من الدنيا قلت نسجلها في بداية سنة 2018 للتوثيق.

1. الكارهين ما تردش عليهم. قاوم الرغبة في أنك تسكته او تعطيه درس. هو مش هدفه أنه يتعلم منك درس، هو هدفه إن يصغر من حجمك إلى ما هو أصغر من حجمه هو. إجتازه. بلوك من حياتك.

2. وجه إهتمامك للناس اللي فاهماتك وتحبك بدون أن تبرر نفسك ليهم. الناس هادي الحياة معاها سهلة وحلوة. إهتم بيهم أكثر. أعطيهم من وقتك.

3. اللي ماقدرش يفهمك، لو يهمك أن الناس تفهمك، دور عالغلط فيك إنت مش الناس. إنت السبب الأول في أن الناس مش قادرة تفهمك. غير من نفسك، مش من الناس. إنت تتحكم في نفسك مش في الناس.

4. مافيش حاجة تستاهل إنك تمرض علي خاطرها أكثر من عيلتك وصغارك. ولاحاجة. إيه ولا. حا. جة!

5. الإنطباع الأولي عليك لما يكون كبير، موضوع خطير شوية، لأن الناس ديما تتوقع منك الأفضل والأحسن (لو هذا كان إنطباعهم الأول عليك) ومهما كنت شاطر فديما إنت مش شاطر هلبا زي ما يتخيلو، وديما متوقعين منك المستحيل. لو إنت في بيئة زي هادي، ياتتحمل وتسكت، يا تطلع منه.

6. مالقيتش صديق وفي، خدوم، مرتاح معاه بدون حواجز؟ كون إنت الشخص هذا!

7. ما تشكيش لكل من هب ودب، أحياناً الشكوى من الوضع اللي إنت فيه يعتبرها الآخر نفخ مش مجرد فضفضة وهدرزة، راهو ناس زمان قالت الشكوى لغير الله مذلة.

8. الرزق من الرازق، نحي من راسك موضوع (قطع الأعناق ولا قطع الأرزاق) اللي طلع بيها هادي أجهل من كندرتي، حتى في عهد الجاهلية يعرفو أن الرازق هو الله! خلاص تو بعد ما نحيتها من راسك، قرر قراراتك وإنت حر ومؤمن بأن في رب واحد كفيل بيك.

9. ياما من صحاب عرفتهم وعرفوك، وينهم توا؟؟ كل واحد في طريقه ومافضلش منهم إلا اللي الدنيا ما بعدتهمش عليك، هادي سنة الحياة، التغيير، لهذا ماتبنيش عليهم شي، مش حتلقى إلا عيلتك في الأخير. إهتم بيها.

10. تواضع، أجلد نفسك، ماتشوفش روحك وصلت في أي مجال في الدنيا، راك ماتعرف شي، ولا حتوصل لمرحلة إنك حتعرف كل شيء، إنت ممكن خبير في حاجة، حتى لو قريتها أكاديمياً، حتلقى صاحب حرفة ماقراهاش، يعرف حاجات أكثر منك، لهذا خليك متواضع، وشكك في كل شيء تعرفه، حتى لو الناس هزت عليك، بعملك حيعرفوك، مش بشهادتك ولبسك وكلامك، نقصد الناس اللي تفهم ومحتمل تكون ليك علاقة قوية معاها، واللي مفروض يهمك رأيها!

11. ماتنجرفش وراء الدنيا بدون هدف، فجأة تلقى روحك معاش تقدر إدير هلبا حاجات بحكم العمر، الإرتباطات أو الفلوس، حط هدف، أكتب شن محتاج باش تحقق الهدف هذا، أبدا اليوم بنقطة رقم واحد من الإحتياجات باش توصله، وإستمر.
إستمر. ?

#خواطر_هرواك (تم النشر على فيسبوك)