مرات نظرتنا الدونية لنفسنا مخليتنا نطلعو بردود أفعال عبيطة.
علاش مانقدروش نطلعو بفيديو داعشي مصورينه من فوق؟ ماعمركم شفتو تصوير كاميرات الواسعة الزاوية كيف تخلي الصورة تبان بعيدة؟؟ و لو مصورينه بتأثيرات معينة علاش التهويل ووصفها بتأثيرات هوليوود وهي موجودة في أي برنامج تشريه بدينار ونص من الظهرة؟؟
هل حني أغبياء لدرجة مش قادرين نصورو فيديو ونحطوه عالنت؟
هل حني “مهيضي الجناح” لدرجة إننا مش حنقدرو نقتلو ونذبحو بني آدم؟ الناس اللي تقول هادو مش ليبيين حسسوني بجديات إن معمر طلع بروحه وقتل روحه بروحه ورفس روحه بروحه واللي حطوه في ثلاجه هو نفسه كر روحه ليها والناس اللي جت تفرجت عليه كبار وصغار ونساوين وهم وخيال وفوتوشوب، اما اللي شدوه فجنون وعفاريت مش بنادمية!
هدرزة
شوية عقل يا عقال، البني آدم بإسم الدين ولما يقتنع إنه ايدير في الحاجة للتقرب من ربي حتشوفو العجب، وليكم في أعتى الجيوش على مر التاريخ، وعلاش على مر التاريخ خلينا شوية قراب، الجيش الياباني وكيف إنه كان يمشي يطير بنص تنك ويقتل روحه في العدو هو وطيارته، شن خلاه ايدير هكي إلا أنه مؤمن بأنها أسمى الميتات وإنها حتخليه يعيش بين الأجداد والأسلاف، الجنة متعهم.
قصص حروب المسلمين وكيف إن قلة غلبت كثرة، كيف كانت مؤمنة بأن موتها مش النهاية بل الهدف هو الموت في سبيل الله، بالله عليك كيف بتحارب عدو مستعد يموت؟ هو جايك يبي يموت، وهادي داعش جاياتك تبي تموت، قصدي فكرو شوية بس في اللي خشو كورنثيا وفجرو روحهم في وضح النهار، قصدي خش شوية في دماغه وفكر علاش بيدير هكي؟
تبي تحارب عدو لازم تفهمه كويس.
هل داعش ياتكون صناعة امريكية أو ماتكونش؟ حني ماشاء الله شعوب كاملين عباقرة وواعيين وماعندناش مرضى؟ تي تاريخنا فيه من القتل والدم مايندى ليه الجبين! بالعكس اني نصدق إن داعش من وسطنا، والليبيين مش الأولين ولا الآخيرين اللي يمشو يحاربو بإسم الإسلام في بلدان تانية مش بلادهم، فعلاش التكذيب؟
كل حد مستفيد من وجود خراب ودمار وزعزعة امن في ليبيا متهم باللي صاير، لكن رانا مش بريئين، وأني بريء من سلبيتكم ياليبيين، في هلبا ناس قعمزت وسكتت وفي من إنقام وإنخطف إلى اليوم مش معروف شن صايرله وفي من مات ورحل علينا، وإنتو جايكم الدور، والله ماكم هاربين منه، ولو عشتو فحتعيشو في الخزي والعار طول عمركم بسكوتكم ورضاكم ومساهمتكم في الفوضى والخراب.
الأضرار والمنافع؟
تو إنت لما تجي تقول هذا وهم ومش حقيقي، هل حسب مدى الضرر من كلامك؟ وهل يساوي أو يقل عن مدى ضرر لو صدقنا بوجود داعش في ليبيا؟ نقولك أني؟
- لو صدقنا بوجود داعش في ليبيا النتيجة حتكون توحيد الصفوف وأيقاف الحرب بين الليبيين وتوجيهها ضد عدو واحد، ولو طلع حق فآهو هذا عدو وتخلصنا منه، ولو طلع كذب، ربحنا توقيف الحرب وتوطيد العلاقة بين الصفوف المتنازعة وإحتمال نكونو درنا حاجة إسمها دولة.
- لو كذبنا بوجود داعش في ليبيا النتيجة حتكون استمرار تفرقة الصفوف واستمرار الحرب بين الليبيين وتوجيهها لبعضهم البعض، ولو طلع حق فهذا إستمرار للخراب، ولو طلع غلط فخراب أكبر وأكبر.
ياريت تحسبوها صح وتفكرو صح ومعاش تخلو حد يجري بيكم، لأن في ناس من مصلحتها استمرار الخراب وإننا نقولو لا مافيش داعش وتقعد مجندة وقتها وأفكارها لإستمرار العميان الجماعي.
أني نرفض إني نشوف أخبار عالفيسبوك ونصدقها، وحتى لو كانت بمصادر، نمشي نشوف هالمصادر ونشكك في مصداقيتها فما بالك بصفحة وهمية تقعد تحطلي في أخبار موثوقة طول السنة حتى تجي اللحظة المناسبة وتبث السم وتحط الأخبار الكاذبة أو جزء منها صادق وباقيها سم.